ఎంత ఎదిగిందో నిన్నటి చూపు

రేపటి కాలాలను కౌగిలించుకుంటూ..

ఎంత ఒదిగిందో నిశ్శబ్దం

శతాబ్దాల చీకట్లను మింగేసుకుంటూ..

     *****

ముట్టి చూడు ప్రతి మట్టి

కవితై పలుకుతుంది

తట్టి చూడు ప్రతి చెట్టు

మమతై కనబడుతుంది

         *****

పర్వతమని అంటావెందుకు?

నేనింకా పరమాణువునే..

మహావృక్షమని అంటావెందుకు?

నేనింకా చిగురునే..

      *****

జీవితం అనుభవమైతే

ప్రతి పుట ఒక కావ్యమే..

      ******

అతడు మౌని

కాని

నిశ్శబ్దాల శిరస్సులపై

ప్రళయాన్ని సృష్టిస్తాడు

అతడు జ్ఞాని

కాని

పాతాళంలో కూర్చుని పాపాల్ని పోగు చేసుకుంటాడు.

     *****

చదువుతున్నాను

పుట పుటకు కాలాన్ని పుకిలించుకుంటూ..

నడిచిపోతున్నాను

అడుగు అడుగుకు సహనాన్ని వెలిగించుకుంటూ..

      *****

ఏది కవితంటే?

తెల్ల కాగితం మీద నల్లగా రాసేదా?

కాదు

నల్లని మనసు మీద తెల్లగా పూసేది.

       *****

కీట్స్ విస్తుపోయే

ఒక కొత్త మెటఫర్  అలమారాలో

దాచిపెట్టాను.

        ****