కవితలు

(June,2020)

ఎడిటోరియల్ బోర్డు

గౌరవ సంపాదకులు :            ప్రొ. కాత్యాయనీ విద్మహే

సంపాదకులు :                           వంగాల సంపత్ రెడ్డి 

సంపాదక వర్గం :                       దాసరి మల్లయ్య

                                                             ఉప్పులేటి సదయ్య

న్యాయ సలహాదారులు :     ఈదుల మల్లయ్య

అమృత రాజ్ కవితలు ఐదు 

          1

పైలంగా వెళ్ళిరండీ!!

 

ప్రాణాలనే కాదు

పసిపిల్లలనూ

మూటల్లా

జబ్బలగ్గట్టుకొని

నెర్రెలువారిన పాదాలతో

మండుటెండలని

కన్నీటితో చల్లారుస్తూ

వందల కిలోమీటర్లు

దాటి

కన్నూరికి పోయే

వలస కూలీలారా

పోండి!

మళ్ళీ రండి!!

 

మీరు జేసిన కష్టం

యజమాని

మీకు చేసిన నష్టం

ధ్వంసమైన కలలు

కార్చిన కన్నీళ్లు

ఆకలికి జిక్కి

కాలి బూడిదైన మీ వాళ్ళు

ఏది...

ఒక్కటి

మరిచిపోకండి

పోండి!

మళ్ళీ రండీ!!

 

కరోనా తరుముతున్న

ఇంతటి విపత్కాలంలోనూ

ఆకలితో మాడ్చి

వీపుల్ని లాఠీలతో ఒలిపించిన

కారకులు పాలకులని

గుండె గుండెకు

చెరిగిపోకుండా చెక్కండి

దేశ నియంతల

బాకీ తీర్చుకొను

మీ పాదాల

ఒరలో దాచిన

కత్తులతో

మళ్ళీ రండీ!

 

తల్లి వేరూ పిల్ల వేరూ

మెలేసుకున్నట్టు

చేయూతనిచ్చి

ఆకలి పేగులకి

జీవం పోసిన

మనుషులను

మనస్సు నిండా

పలకరించేందుకు

మళ్ళీ రండీ!

పైలంగా వెళ్లి రండీ!!

 

 

 

         2

రిలీజ్ ది పోయెట్ నౌ

 

అక్షరాలు

ఎరుపెక్కాయి

బెంగాల్

బంగ్లాదేశ్ వీధుల్లో

పదాలయ్యి

ప్రచారం చేస్తున్నాయి

 

వాక్యాల వారధులు

నిర్మిస్తున్నాయి

గాయాలని

గేయాలుగా వినిపిస్తున్నాయి

రాష్ట్రాలు

దేశాలు దాటి

దేహాల భావాలని

భౌతిక శక్తిగా మార్చి

నినదిస్తున్నాయి

 

నిర్బంధించబడిన

తోటి అక్షరాలని

అక్షరాలుగా మార్చిన

ప్రపంచ వస్తువులని

ఫాసిస్ట్

నియంతల నుండి

విడిపించి

అల్లుకొని

ఆసు పాటలో

చరణాలయ్యేందుకు

ఘర్జిస్తున్నాయి

 

సత్యాన్ని విలువల్ని

రేపటి చరిత్రలో నిలిపేందుకు

జాతి కుల మతాల్లేకుండా

లింగ ప్రాంత భేదాల్లేకుండా

మనుషుల్ని మనుషులుగా

గౌరవించాలని

ప్రశ్నించే ప్రజాగొంతుల

గొంతు కోయద్దని

సాగుతోంది

అక్షర యుద్ధం

 

కదలిరా...

నువ్వో అక్షరమై

ప్రజల ప్రజాగొంతుల

విడుదలకై

 

(భీమా కోరేగావ్ కుట్ర కేసులో నిర్బంధించబడిన ప్రజాస్వామిక వాదుల్ని కవులు,లాయర్లు,

ప్రోఫెసర్లు,దళిత,ఆదివాసీ ప్రజలందరిని విడుదల చేయాలని బెంగాల్,బాంగ్లాదేశ్ కవులు "రిలీజ్ ది పోయెట్ నౌ" అంటూ చేస్తున్న కాంపెయిన్ కు మద్దతుగా నా అక్షరాలు...)

 

 

          3

మేమిక్కడా-మీరక్కడా

 

మేమిక్కడా-మీరక్కడా

జైళ్లోనే ఉన్నాం

మేం భయంతో

మీరు గర్వంతో

 

మేమిక్కడా-మీరక్కడా

ఆలోచిస్తూనే ఉన్నాం

మేం భయటికెట్లారావాలని

మీరు ప్రజల లోపలికెట్లాపోవాలని

 

మేమిక్కడా-మీరక్కడా

రాస్తూనే ఉన్నాం

మేం విలాప గీతాలని

మీరు విముక్తి గీతాలని

 

        4

కవి

 

అతనికి

పక్షులంటే చాలా ఇష్టం

తియ్యగా పలుకుతాయని

స్వేచ్ఛగా ఎగురుతాయని

 

రోజు

దారెంట నడుస్తున్నాడు

పంజరంలో

బంధించబడిన

పక్షుల చూసాడు

 

తనకు ప్రాణం పోయినట్టనిపించింది

ప్రతీ జీవి

స్వేచ్ఛగా బ్రతకాలని

దాని హక్కదని

గట్టిగా అరిచాడు

మృగాలను ఎదురించి

బంధీగున్న పక్షులను

విముక్తి పథానికి నడిపించాడు

 

అది నేరమని

క్రూర

మృగరాజ్యం

తనని ఖైదు చేసింది

 

కసి కసిగా

స్వేచ్ఛా నినాదాలతో

దూసుకొస్తున్న

పక్షుల గుంపు

తమని విడిపించినతని

విడుదలకై

 

          5

చెల్లను గాక చెల్లను

కాలాలు పరుగెత్తుతున్నా

సంవత్సరాలు పారిపోతున్నా

కష్టాల కన్నీటి సాగరాలు

సునామిలై

ముంచేస్తున్నా

నలుదిక్కుల ఆంక్షలు

సంకెళ్ళై

తొక్కేస్తున్నా

కన్న పిల్లల కోసం

నిలువెత్తు

ఉక్కు రూపాలై

 

ఎవరి సాయమందకున్నా

నమ్ముకున్న

వ్యవసాయం కై

నిత్యం నేటికీ

పొలాలల్లో

గింజలై మొలకలై

తిండిపెట్టే పంటలై

అకలిని తీర్చే

అవని పుత్రికలు

నా తల్లులు

 

నేనేం రాసినా

చెల్లను గాక చెల్లను

మిమ్ము రాయకుండా

మీ దుఃఖాన్ని చేరిపేయకుండా

 


ఈ సంచికలో...                     

Nov 2020