కవితలు

(January,2020)

ఎడిటోరియల్ బోర్డు

గౌరవ సంపాదకులు :            ప్రొ. కాత్యాయనీ విద్మహే

సంపాదకులు :                           వంగాల సంపత్ రెడ్డి 

సంపాదక వర్గం :                       దాసరి మల్లయ్య

                                                             ఉప్పులేటి సదయ్య

న్యాయ సలహాదారులు :     ఈదుల మల్లయ్య

భయద సౌందర్యం

ఎవరూ లేని ఏకాంతం లో సాంత్వన లేదు

అందరూ ఉన్న ఒంటరి తనం లో ఓదార్పులేదు 

ఒక సామూహిక అస్తిత్వవేదన 

నమ్మకం కోల్పోయిన చూపుతో 

పతనం అంచుల్లో వేలాడుతోంది 

ఒక నాజూకు చేతన 

ప్రేమ రాహిత్యం లో నలిగి పోతోంది 

మర్చిపోయిన ప్రేమలూ,దారితప్పిన బంధాలు, కన్నీటి మసకలో దోబూచులాడుతున్నాయి 

సాధువుల ప్రవచనాలు,మేధావుల విశ్లేషణలు,స్పష్టమైన లక్ష్యాన్ని నిర్దేశించడం లేదు

పశ్చాత్తాపాన్ని మన్నిస్తూ క్రీస్తు గాయాలింకా 

రక్తమోడుతూనే ఉన్నాయి 

సంఘం శరణం గచ్చామి అంటూ 

బుద్ధుడు భిక్షాపాత్ర పట్టుకొని 

దుఃఖం లేని ఇంటికోసం అన్వేషిస్తున్నాడు

సత్యంవద, ధర్మం చెర, ప్లేకార్డులు పట్టుకొని 

మహాత్ముడు దీక్షాశిబిరం లో కూర్చున్నాడు

వేమన్నలూ, బద్దెనలూ, సామాజిక వ్యాఖ్యానాలు చేస్తూ

మన మధ్యనే తిరుగుతున్నారు 

కాస్తప్రేమ, కాసింతజాలి ,కొంచెం నమ్మకం 

ఎక్కడైతే దొరుకుతాయో 

అక్కడ మనిషనే వాడుండాలి

ఈ లోకంలో మంచిని మినహాయించుకొని 

దర్జాగా బతికెయ్యడం చాలా సులభం

అనుభవాల నేపధ్యాలన్నీ నిప్పురవ్వలై

ఎగిసి పడుతూంటే 

నిద్రకీ మేలుకువకీ మధ్య,

రెప్పలకి అంటుకున్న తడి స్పర్శ 

ఎంతకీ ఆరిపోదు కదా 

దేహం మూల మూలల్లో చిప్పిల్లుతున్న దుఃఖాన్ని అదిమి పెట్టాలంటే 

ఈ పెదవుల మధ్య ఎంత ఘర్షణ  

విష్పోటనం లో విధ్వంసమైన ప్రాంతాన్ని 

పునర్నిర్మించు కోవచ్చు 

నానాటికీ ధ్వంసమై పోతున్న మనుషుల 

హృదయాల్ని మళ్లీ నిర్మించుకోగలమా 

అని నా సందేహం 

ఈ సంక్లిష్ట స్థితిలో మన భుజం తట్టే ధైర్యవచనాలే  కవిసమయాలు 

పిరికి తనం నుండి ధైర్యంలోకి 

భయం నుండి స్వేచ్ఛలోకి 

నన్ను నడిపించే నా నేస్తమే కవిత్వం!!


ఈ సంచికలో...                     

Jul 2021

ఇతర పత్రికలు