ఎక్కడ స్త్రీలు పూజింపబడతారో అక్కడ దేవతలు నివసిస్తారన్నది  లెర్నింగయితే 

ఎక్కడ దేవతలు నివసిస్తారో అక్కడ స్త్రీలు చెరచబడతారన్నది అన్ లెర్నింగ్!

మానవసేవే మాధవసేవ అన్నది లెర్నింగయితే 

మనిషిని తోటి మనిషే రాక్షసుడి

కన్నా హీనంగా హింసిస్తూ దేవుడి పేరుమీద దోచుకుంటున్నాడన్నది అన్ లెర్నింగ్!

మనుషులందరూ సమానమేనన్నది అందరం నమ్మే  లెర్నింగయితే

తరతరాలుగా సమానత్వం సమాధానం కోసం ఎదురుచూస్తున్నదని  తెలుసుకోవడమే అన్ లెర్నింగ్!

ప్రజాస్వామ్యంలో ప్రజలే దేవుళ్ళన్నది లెర్నింగయితే

అదే ప్రజాస్వామ్యంలో ప్రజలను జోకర్లుగా మారుస్తున్నారని  గ్రహించడమే అన్ లెర్నింగ్!

ధర్మాన్ని నువ్వు నడిపిస్తే ధర్మం నిన్ను నడిపిస్తుందన్నది లెర్నింగయితే

అదే ధర్మం కాళ్ళు తెగి నడివీధిలో అనాథై కుంటుతున్నదని తెలుసుకోవడమే అన్ లెర్నింగ్!

భిన్నత్వంలో ఏకత్వం మన బలమన్నది లెర్నింగయితే 

మతం ప్రాతిపదికన, కులం ప్రాతిపదికన సమాజాన్ని ఛిద్రం చేయడం నాయకులకు వరం అని గ్రహించడమే అన్ లెర్నింగ్!

రైతే దేశానికి వెన్నుముక అన్నది లెర్నింగ్ అయితే వెన్నెముక లేని వాడే నేటి రైతు అని తెలుసుకోవడమే అన్ లెర్నింగ్!

పుస్తకాల్లో ప్రతి అట్టమీద అంటరానితనం, అస్పృశ్యత నేరమని చదువుకోవడం లెర్నింగయితే 

రోజురోజుకూ పెరిగిపోతున్న కులవివక్ష కుత్తుక కోయడానికి కొత్త కత్తులు అవసరమని తెలుసుకోవడమే అన్ లెర్నింగ్!

నమ్మిన సిద్ధాంతం కోసం ప్రశ్నిస్తే బుల్లెట్ల వర్షాన్ని ఎదుర్కోవాల్సుంటుందన్నది  లెర్నింగయితే 

శరీరమంతా వందల బుల్లెట్లతో జల్లెడ పట్టినా

చైతన్య ప్రవాహాలను ఆపలేరని...

నినదించే గొంతులు వేలల్లో, లక్షల్లో పుట్టుకొస్తాయని అర్థమయ్యేలా చెప్పడమే అన్ లెర్నింగ్!

"Finally we have to unlearn everything what we have learnt so far..!"

కళ్ళముందు పట్టెడన్నం దొరకక

తనువు చాలిస్తున్న అభాగ్యులను చూసి 

ఉండబట్టలేక ఒక్క అడుగు బయట వేశాను

గుప్పెడు బియ్యాన్ని చేతిలో పట్టుకొని!

ఏ దిక్కుకు పోవాలో తెలియక

అంబేద్కర్ బొమ్మ ముందు

దిగులుతో కూర్చున్నాడొక వలసకూలీ!

చేతులు చాచాలంటే ఆత్మాభిమానం అడ్డు వచ్చినట్టుంది

ఒకప్పుడు బుక్కెడు బువ్వ కోసం తండ్లాట పడ్డవాళ్ళలో నేనూ ఒకడినని భుజం తట్టాను

దైన్యంతో కూడిన అతని చూపులు ఇంకా వెంటాడుతూనేఉన్నాయి!

చిరిగిన పరదా వెనక

ఏ ఆసరా లేని డెబ్బై ఏళ్ల పైబడిన వృద్ధురాలు

పింఛను పైసలు రోగాలురొప్పులకు పోగా

ఖాళీ డబ్బాలు సప్పుడు చేస్తున్నాయి

ఆ అవ్వకు బతుకు నిత్య సమరం!

మా ఇంటి తొవ్వ ఎట్ల తెలిసింది బిడ్డా అని అడిగింది

ఈ దేశంలో ఏ తొవ్వ చూసినా కొస్సకు ఉండేది పేదల ఇండ్లే కదా అవ్వ అని చెప్పి ముందుకు నడిచిన!

అతడో కళాకారుడు

కళను అమ్ముకోని, అమ్ముకోలేని పిచ్చిమారాజు

ఇంట్లో ఏమీ లేకపోయినా అందరూ ఇంట్లో ఉండాలని పాటకడుతున్నాడు

గర్జించడమూ, గళమెత్తడమే అతడికి తెలుసు

పైసలు లెక్కపెట్టుకునుడు, లెక్కలేసుకునుడు తెల్వదు

గజ్జెలు ఓ మూల నుండి జాలిగా చూస్తున్నాయి

పాట ఒక్కసారిగా ఘొల్లుమన్నది!

ఇదో ఇద్దరు పండుటాకుల కథ

అన్నీ అమ్ముకొని ముగ్గురు బిడ్డల పెండ్లి చేసిళ్ళు

సర్టిఫికేట్లల్ల ఏం తప్పైందో ఏమో ఒక్కరికే పింఛను వస్తదట

ఒక్క పింఛను పైసలల్ల ఇద్దరు బతకాలే...

మందులూ మాకులు అన్నీ అందులోనే!

కొంతమందికిది ఒక్కపూట ఖర్చు!

వచ్చేటప్పుడు రెండు చేతులెత్తి మొక్కి

మళ్ళెప్పుడస్తరు బిడ్డా అని అడిగిర్రు

ఈసారి నా కళ్ళల్ల నీళ్ళు తిరిగినయి!

గడపగడపకో తీరని వ్యధ

ఏదేమైనా మళ్ళోసారి వెళ్లిరావాల్సిందే -

వాళ్ళు ఎదురుచూస్తుంటారు!

చిత్రగుప్తా, మానవులంతా కుప్పలు కుప్పలుగా వచ్చుచున్నారేమిటి?

వీరికి కొత్త సమస్యొకటి వచ్చినది, ప్రభూ!

అందుకే ఇలా వచ్చుచుంటిరి!

ఏమైనా ప్రళయం సంభవించినదా?

వీరి బాధను మాటల్లో వర్ణించలేకున్నా ప్రభూ!

శాస్త్ర సాంకేతిక రంగాల్లో అబ్బో, వీరి ప్రతిభ మేటిదన్నావు కదా!

హిమ శిఖరము కరిగినదా?

లేదు ప్రభూ!

సూర్యుడేమైనా కోపంతో రగిలిపోయాడా?

కాదు ప్రభూ!

మరి యెలా మరణించితిరి, సునామీ సంభవించినదా?

అటువంటి ఉపద్రవాలు కాదు ప్రభూ!

మరి..!

కంటికి కనిపించని క్రిమి ఒకటి

వీరికి కంటి మీద కునుకులేకుండా చేస్తున్నది!

కంటికి కనిపించని క్రిమియా!

అవును ప్రభూ, కాలు కదపరాదట, కరచాలనం చేయరాదట!

సిగ్గుచేటు...

ఇంత బతుకు బతికి

ఇంత మేధస్సు కలిగి ఉండి

క్రిమి చేతిలో మరణించుటయా!

కరోనా అనే క్రిమి వీరిని పగబట్టినది ప్రభూ!

ప్రాణాలను హరించివేస్తున్నది!

స్వార్థపరుడైన మనిషి చివరికి కరోనా... కరోనా... అని రోదించవలసి వచ్చినదా!

ప్రభూ, వీరికి బతికే మార్గం లేదా?

తప్పులకు చింతించవలె

ప్రకృతిని ప్రేమించవలె

భూమి అన్ని జీవులది!

ఇకనైనా అర్థం చేసుకున్నయెడల బతుకుదురు,

మారనిచో మానవజాతే సమసిపోవును!

చిత్రగుప్తా, ఎందుకైనా మంచిది డిస్టెన్స్ మెయింటైన్ చేయండి!

వీరినసలే నమ్మరాదు

మనకు కరోనా సోకినచో పోవుటకు వేరే లోకం లేదు!!