నీకూ నాకూ మధ్య

కనపడని ఖాళీస్థలం

ప్రేమానుబంధాల ఊట చెలిమెలు ఇంకిన జాడలు

గ్లోబల్ తాపానికి రగిలిన

అసూయాద్వేషాల అనైతిక బీటలు

ఖాళీని పూడ్చ లేని అసహాయతా ఒక అగాధం

ఆవలి ఒడ్డున నీవు

ఈవలి ఒడ్డున నేను

నీ చుట్టూ నా చుట్టూ

సుడి చుట్టుకున్న ఒత్తిళ్లు

వర్గాల వర్ణాల ప్రాంతాల రాజ్యాల మీదుగా

పాకిన ఖాళీతనం

కుటుంబ బంధాల వ్యక్తుల మధ్య

అల్పపీడనంగా మారి

తుఫాను భీభత్సాలు సృష్టిస్తోంది

తుఫాను ఎల్లకాలమైతె ఉండదుగని

అదిచేసే నష్టం అంతా ఇంతా కాదు

ఏముంది కరిగించనీకి..గుట్లా,గట్లా?

యిసుమంత కొవ్వుపొరలేనోళ్ళు

రెక్కాడందే డొక్కాడని

చెమటసంతకాలు

ఏనాడో రోడ్డునపడ్డోళ్ళు..

గాయాల్ని ఉండసుట్టి

సుట్టబట్టలేకుంట మోస్తున్నోళ్ళు

అలుపులేక సోళిపోతూ నడుస్తుండ్రు

గూటికో..కాటికో

నడుకకు మెతుకు సూపే నాయకులేరి?

నడుకకు బడ్జెట్ భరోసా కల్పిస్తదా?

              ★★★

వాళ్లు ఎన్నెముకై నిలబెట్టినోళ్ళు

నిట్టాడై మోసినోళ్ళు కదా దేశాన్ని

ఎండకు వానకు కందకుంట

కాపుకాసే భవంతులు

పాదం కములకుంట గమ్యం చేర్పే వంతెనలు, రోడ్లు

విలాసాల్ల ముంచెత్తే వాహనాలు, గృహోపకరణలు

వాళ్ళ స్వేదజలంల మొలకెత్తినయే కదా..

ఎట్లమరుస్తాం పెబూ!

ప్రళయాలు నేర్పే పాఠాలు ఒంటబట్టలేదా?

విపత్తుల తత్వం బోధపడలేదా తండ్రీ?

ఆధిపత్యపు,అహంకారపు మసకసూపులను

మానవత్వంతో కడిగి

మళ్ళోపాలి సూడుర్రయ్యా..

ఎప్పటికైనా అంతరించాల్సింది

మహమ్మారి భావజాలమే..

మనిషి కాదని తేటతెల్లమైతది.