1

ఎవరివో ఈ పాదముద్రలు?

దారిపొడుగూత చెమట చుక్కల సంతకం చేస్తూ

కాలిబాట పట్టాయి

నెత్తిమీద ముల్లెమూటలను సంకలో పిల్లజెల్లలను ఎత్తుకొని

గుంపులు గుంపులుగా పయనమయ్యాయి

గనులు భవనాలు కార్ఖానాలను

కాంక్రీటు ఇసుక ఇటుక బట్టీలను వొదిలి

పల్లెలను పట్టణాలను నగరాలను ఖాళీచేస్తూ

తప్పిపోయిన దారులను వెతుక్కుంటున్నాయి

2

ఏం రోగమో ఇది?

ఆకలి కన్నా పెద్దమాయ రోగం

ఈ భూస్థలమంతా వెతికినా దొరకదు కదా??

గూడు చెదిరిందో గుండె పగిలిందో?

రోజంతా పగలు రాత్రుళ్ళను కప్పుకుని

బిక్కుబిక్కుమంటూ నేలచూపులు చూస్తూ అడుగులేస్తున్నాయి

నడిచి నడిచి పాదాలన్నీ చిట్లిపోయినా

కళ్ళల్లో ఏవో ఆశల వొత్తుల్ని వెలిగించుకుని ముందుకు నడుస్తున్నాయి

3

నడక

నడక

ఎడతెగని నడక

వందల వేల కిలోమీటర్ల నడక

పాదాలన్నీ నెర్రలుబారిన నడక

ఆకలిని దప్పికను మరిచిన నడక

ఈ దేశపు ముఖచిత్రాన్ని నిలబెట్టిన నడక

వాళ్ళకు నడక కొత్తేమీ కాదు

ఏండ్లతరబడి ఆ చివరి నుండి ఈ చివరి వరకు-

ఈ చివరి నుండి ఆ చివరి వరకు ఎప్పుడూ నడుస్తున్న నడకనే కదా?

వాళ్ళను అలాగే నడనివ్వండి,దయచేసి ఆపకండి

4

పగిలిన పాదాలు

మట్టిని చీల్చకముందే వాళ్ళను వెళ్ళనివ్వండి

మాసిన ముఖాలు

మట్టిలో తెల్లారకముందే వాళ్ళ గడపను చేరుకోనివ్వండి

బతుకుపాఠంలో మళ్ళీ కొత్త కలలకు ఊపిరి పోసుకోనివ్వండి