మా రచయితలు

రచయిత పేరు:    ఎన్ బి సాంబమూర్తి

కవితలు

అదిగో...అల్లదిగో... ఆ క్షణం...!

అల ఈశాన్య రాజ్యంలో ఊహాన్ నగరిలో

జనించెనట జీవం లేని వైరస్, క్రొవ్వుపొరలో!

చేసెనే కరోనా కణ సేన భువిపైన ఆక్రమణం!

పట్టెనే పుడమికి సూర్యచంద్రరహిత సుదీర్ఘ గ్రహణం!

 

గబ్బిలాలు, పాంగోలిన్ వంటలతో నిండె ప్లేట్లు,

క్రూరమైన, అడ్డగోలు ఆహారపు అలవాట్లు,

దానితోనె ఆరంభం మానవాళికి అగచాట్లు,

క్రమ్మెనంట పృథ్విపై కానరాని కారు చీకట్లు!

 

కాలేదు ఈ మహమ్మారి చైనాకే పరిమితం,

కలిగించెను కల్లోలం, చూడలేదె అంతక్రితం,

వ్యాపించెను వేగంగా ఆ దేశం ఈ దేశం,

విడువలేదు భూమి మీద ఏ ఒక్క ప్రదేశం!

 

విశృంఖలమై విజృంభించె కరోనా కణాలు,

ఘడియ ఘడియ నమోదయ్యె లెక్కలేని మరణాలు,

ఖననానికె కష్టాలు, కడతేర్చని ప్రాణాలు,

మరలెన్నడు రాకూడదు ఇటువంటి తరుణాలు!

 

అన్నిటినీ త్యజించి, సేవించే సిబ్బంది,

తోడుండగ దరికి రాదు ఏ ఒక్కరికి ఇబ్బంది!

'కలిసుంటె కలదు సుఖం' ఆలనాటి నినాదం,

'కలిసుండుట వలదుఅనె ఈనాటి ఈ వేదం!

 

పరిశుభ్రతే బ్రహ్మాస్త్రం,

మనోబలమే మన శస్త్రం,

చింతించక చితినిపెట్టు,

కరోనారక్కసిని మట్టుబెట్టు!

 

క్లిష్టమైన ఈ యుద్ధంలో ప్రతిఒక్కరు సైనికులే

కరోనా 'పద్మవ్యూహం' ఛేదించే అర్జునులే,

భస్మమవును త్వరలోనే వైరస్సు కణం కణం,

అదిగో అల్లదిగో  మానవులు గెలిచే ఆ క్షణం!

అదిగో అల్లదిగో 'మనమంతా' గెలిచిన క్షణం!

 

జీవన స్మృతులు...!

స్వేచ్ఛగా విహరించిన పక్షులు!

స్వచ్ఛమైన గాలి పీల్చిన వృక్షాలు!

 

రోడ్ల నిర్మానుష్యం!

తగ్గిన కాలుష్యం!

 

శూన్యమైన ట్రాఫిక్ జాములు!

మూసిన  సినీ 'మాలులు'!

 

ఆరిపోయిన సిటీ సిగ్నల్స్!

ఆగిపోయిన టీవీ సీరియల్స్!

 

ఇంటివద్దకే కూరగాయలు, పండ్లు!

దుమ్ముపట్టి మొరాయించిన బండ్లు!

 

నిత్యవసరాలకై ఇక్కట్లు!

కుదేలైన షేర్ మార్కెట్లు!

 

సాయంత్రం చప్పట్లు!

వెలిగించిన దీపాలు!

 

మూసిన దేవాలయాలు!

మూగబోయిన విద్యాలయాలు!

 

స్తంభించిన రవాణాలు!

నిలిచిన ప్రయాణాలు!

 

కరువైన మందు!

ఫంక్షన్లు బందు!

 

ఆగిన గడియారాలు!

పెరిగిన క్షవరాలు!

 

బడుగు జీవి కష్టాలు!

వ్యాపారుల నష్టాలు!

 

వలస కూలీల అవస్థలు!

కూలిన ఆర్ధిక వ్యవస్థలు!

 

తగ్గిన జీతాలు!

తలొగ్గిన జీవితాలు!

 

సానిటైజర్లు చల్లిన చేతులు!

మాస్కులు తొడిగిన మూతులు!

 

ఆన్లైన్ బోధన తరగతులు!

లక్డౌన్ "జీవన స్మృతులు"!

 

పారాహుషార్...!

ఆకాశం తాకే అద్దాల హంగుల మేడలు

మచ్చుకకైనా కానరాని పచ్చిక జాడలు

మట్టిని మాయంచేసె కాంక్రీటు కాడులు

జనసముద్రములలో కరువైన తోడులు!

 

జలాశయాన్ని జారిన ప్రవాహాల హోరా!

కూడళ్ల గీతలు దాటిన వాహనాల జోరా!

అకస్మాత్తుగా పయనం స్తంభించిన పౌరా

ఖరీదైన కాలం ఖర్చాయె! ఔరా! ఔరౌరా!

 

దారులలో కదిలే కృత్రిమ నక్షత్ర నదులు

పీల్చటానికి పుష్కలం కాలుష్య పొగలు

పెరిగే పాదరసంతోడు అనావృష్టి దిగులు

నేల చీల్చుకుని నింగికెగిసే నగర నగలు!

 

ఎండిన ఎడారిలో కుండపోతలు పోసి

మురిసె బోసిపోయిన అలనాటి మూసీ

కదలనీయక దారులు దారుణంగా మూసి

ప్రకృతి ప్రళయానికి వణికెను పట్టణవాసి

 

కడలిని కనులెదుట తలపింపు నదులు

కదిలించె అకట! సకల నగర పునాదులు

జలము అవనిలోనికి ఇంకుట బదులు

జనుల ఆవాసాలను మింగుట మొదలు!

 

విరగ నవ్వుచుండె విరిగిన మాకో మానో

క్రమక్రమంగా ఆక్రమణకు గురైన కొలనో

క్రమశిక్షణ నికరముగా లోపించుటవలనో

ముంగిట ఘంటిక మ్రోగించెనా ఎల్ నినో

ఈ చిక్కునకు బాధ్యులము నువ్వో నేనో!

 

సుతలంపై పెరుగుతున్న ఒత్తిడి భారమా

భూతలంపై పంచభూతాల ప్రతీకారమా

ఏతలంపై ఎగసిపడునో కార్యరూపమా

రాతల మార్పునకు కాంతిని చూపుమా!

 

పారాహుషార్ పలికెను పర్యావరణము

ఈ రణమునకు మనమే కదా కారణము

హద్దులలో ఒదిగుండుటొక్కటే శరణము

పద్దులు మీరిన తప్పదు సంస్కరణము!

 

ఈ సంచికలో...                     

Jun 2021

ఇతర పత్రికలు