మున్ముందు

 నా నాలుక సందులో ముల్లు

పెదాల ఉపరితలంపైన

మోయలేని బరువులు దించబడుతాయి

ప్రశ్నించడానికి

లోపలి నరాలన్నీ

గిలగిలా తన్నుకొని కూలిపోతాయి

ఇక్కడి మట్టి ఆనవాళ్లను

నా దేహం మీద వెతుకుతావు

రక్తాన్ని జల్లెడ కట్టి

పిడికిట్లోకి మట్టినెలా తేవాలి ?

గుర్తింపు కార్డులన్నీ

ముఖం వేలాడేసి

నన్నొక దొంగలా నిలబెడుతున్నాయి

నన్ను నేను తవ్వుకుంటూ పోయి

వెతుకుతున్న తీగ

కాళ్లకు తగలక బొక్కబోర్లా పడతాను

ఈ నేల గాలి నీరు నింగి నిప్పు

నావేనని చెప్పడానికి

రుజువులు అడుగుతావు

నా చెమటను పరీక్షనాళికలో వేయి

అది పంచభూతాలుగా విడిపోతుంది

నా శ్వాసను వస్త్రగాలం పట్టు

ఈ దేశ మూలవాసిగా రూపుకడుతుంది

చివరిగా ఒక ప్రశ్న అడగనా ?

నీ ఒంట్లో పారుతున్న నెత్తురుది

ఈ దేశమేనా ?